Flottir leikir í meistaradeildinni búnir. Svaka leikur á brúnni í fyrradag og ég hefði aldrei þorað að vona að Liverpool myndi skora 4 mörk þar. En það varð raunin en leikurinn vannst samt ekki!! Alveg ótrúlegt dæmi. Hafði reyndar engar væntingar um að komast áfram eftir fyrri leikinn. En þetta varð langskemmtilegasti leikur umferðarinnar.
Líst vel á undanúrslitin og það er pottþétt að úrslitaleikurinn verður með tveimur "alvöru" liðum.

Við Valsmenn vorum ekki að æfa í gær. Frí og menn mæta brattir á eftir í þessu blíðviðri. Mann hlakkar alltaf svo svakalega til á þessum árstíma. Vor og milt veður. Manni líður eins og krakka sem er að bíða eftir jólunum.
Ég sjálfur er reyndar að ströggla þessar vikurnar en vonandi get ég mætt aðeins í bolta í kvöld.
Finnst mannskapurinn allur að koma til. Menn hressari og svona léttari allir í lund. Sést líka á spilamennsku manna. Hópurinn okkar hefur gríðarlega möguleika á að gera góða hluti í sumar og er ég viss um að það eigi eftir að gerast góðir hlutir á Hlíðarenda.
Förum ekki í æfingaferð þetta árið sem hefur aðeins truflað hausinn. Venjulega hefur undirbúningurinn styst mikið við að fara í þessar ferðir sem hafa verið endapunktur á æfingavetrinum og byrjunin á sumarsisoninu. En núna hefur æfingaveturinn verið lengri en áður og menn bara að bíða eftir mótinu sjálfu.
Mæli með ferðum liða. Ekki spurning og tel ég það vera algjörlega nauðsynlegt bæði fótboltalega og ekki síst félagslega.

Annars stefni ég á leik Vals gegn HK í kvöld. Fyrsti leikur í úrslitakeppninni. Loksins eitthvað almennilegt að gerast í handboltanum. Hef saknað úrslitakeppninnar síðustu ár og er alls ekki sammála þeim sem eru á móti henni. Langt í frá. Sjáið körfuna. Skil ekki af hverju menn telji úrslitakeppnina í körfunni ganga upp en ekki í handboltanum. Hroki finnst mér oft
Finnst að það verði að vinna 3 leiki til að komast áfram. Þá ætti það að tryggjast að betra liðið fari áfram.

Páskadagur runninn upp og það sólríkur. Tilvalinn upprisudagur í víðum skilningi. Allt að verða vitlaust í þjóðfélaginu útaf spillingu og röngu siðferðismati (eins og það sé nýtt). Ekki gott að vera sjálfstæðismaður núna.

Boltinn á fullu. Ég meiddur í nára og hef aðeins verið að ströggla með það síðustu vikurnar. Verð í standi þegar mótið byrjar líkt og í fyrra á ég von á.

Annars er það að frétta að Lengjubikarinn er á fullu og síðasta umferðin framundan í riðlunum. Hef aðeins séð af leikjum og finnst ekkert lið og þar með talið við vera búin að mótast nema FH sem virka mjög sterkir núna. Finnst þeir eins og við Valsmenn vorum í fyrra á sama tíma.
Stjarnan og Fylkir komast uppúr sínum riðli og skilja m.a. KR eftir með sárt ennið. Bæði lið með unga stráka sem eiga að vera sprækir núna og eru. Við eigum reyndar Fylkir í fyrsta leik í Árbænum og verður það svaka leikur.
FH og Þróttur komast uppúr sínum riðli og það nokkuð örugglega. FH langbestir þar og mjög liklegir.
Grindavík og Sennilega HK fara uppúr sínum riðli þar sem Fram og Keflavík sitja eftir. Grindvíkingarnir líta vel út segja þeir sem hafa séð þá. Eru komnir með lið fyrr í mótun þetta árið en mörg undanfarin og eru fínir. Sá þá reyndar um daginn gegn HK og þar var ég ekki imponeraður en þeir virðast hafa bætt sig mikið ef marka má heimildamenn.
Svo er það okkar riðill þ.e. Valsmanna. Ræðst um næstu helgi. Við, Breiðablik,Fjölnir og Þór eigum öll möguleika. Reyndar nægir okkur og Blikunum sigur til að vera örugg áfram. Við eigum KA fyrir norðan og Blikarnir eiga Aftureldingu og Fjölnir á Þór fyrir norðan svo þetta verður spennandi.

Við Valsmenn erum svo að segja nýbyrjaðir að æfa við viðunandi aðstæður þ.e. á stórum velli með markmönnum. Já þið lesið rétt. Vorum í sporthúsinu frá jan alveg þar til fyrir 2 vikum á litlum velli, í raun innanhús (sem er gaman í nóv-jan). Þannig erum við ekki alveg búnir að stilla strengi en það er allt að koma og bara spennandi næstu vikur. Leikur okkar á því eftir að styrkjast mikið og verðum við vonandi til alls líklegir þegar mótið byrjar. Mannskapurinn er svo sannarlega til staðar og komnir með Togga Þráins sem er bara til að styrkja hópinn.

Eins og staðan er núna þá líta FHingarnir langbest út. Grindvíkingarnir þokkalega. Aðrir eiga svo eftir að stilla allt frá lítillega til verulega fyrir mótið.

Sigur í gær á móti Víking í Reykjavíkurmótinu 1-0. Mótið er búið fyrir okkur samt sem áður. Tveir sigrar gegn nágrönnum okkar í Fram og Víking og tvö töp gegn liðum ofan við snælínu ÍR og Fylki.
Höfum ekki verið að spila sannfærandi. Erfiðar æfingar við erfið skilyrði þ.e. æfum mikið á litlu svæði sem hefur ekki hresst upp á spil okkar. Hinsvegar erum við ekki að stressa okkur á þessu a.m.k. ekki ég. Það sem skiptir máli er að vera í lagi þegar Íslandsmótið byrjar og vera með tæran haus þá.
Af fenginni reynslu þá geta allir unnið alla á þessum árstíma og það hefur ekkert spágildi fyrir átök sumarsins. Sum liðin eru uppfull af góðum janúar og febrúarleikmönnum. Önnur með nokkra góða marsspilara en að sem skiptir máli er að hafa sumarleikmenn á Íslandi Er .þetta ekki nokkuð góð útskýring?

Annars erum við Valsmenn að styrkja okkur. Höfum fengið nokkra leikmenn og held að það geti orðið fleiri þegar upp er staðið. Höfum auðvitað misst fjölda manna svo það verður að bæta í.
Menn hafa verið að grínast í mér að maður fari alltaf aftar og aftar í röðinni. Ég hef svarað þessu liði þannig með dæmisögu.
Þú getur farið útí Hagkaup og keypt þér flottasta flug/bílamódel sem völ er á í heimi hér. Með alla flottustu bútana í bransanum en ef þig vantar LÍIMIÐ þá getur verið að þú komist ekki langt með smíðina. (nema kannski með smellumódeli en þau eru léleg og detta alltaf í sundur).

Annars sáttur bara. Svakalegt með Hemma Gunn að geta ekki náð inn fleirum á Fésbókina sína. Maður sefur varla.

Nú stefnir maður á skíði seinna í dag. Sýnist veðrið vera frábært og tilvalið að æfa blóginn aðeins. Er nokkuð að koma til en sé alltaf jafn mikið eftir því að hafa ekki tekið a.m.k. nokkrar ferðir fyrir norðan ungur. Tækifærin voru fjölmörg þá, sorglega mörg ónýtt.

.

Árið
Kom yfir mig andinn hér um daginn og ég setti saman þetta ljóð sem ég er bara sáttur með. Um að sem hefur verið að gerast. Það er svohljóðandi

Nú er að spara
það verður bara
því eins og mara
hvert á að fara?
Ég var rændur
nánast flæmdur
burt eins og bændur
samt áður var sæmdur
nú verðlausum hlutum
á þeim við flutum
litla manninn skutum
og við nutum.
Hvar átti að stoppa
þótt búið að floppa
allir að kroppa
hvern átti nú að toppa?
Þótt erlendis væri varað
og við okkur talað
við hlustuðum ekki þó væri galað
við gátum ekki sparað!
Krónan drapst
það spurðist, það barst
þú nánast brast
ekkert var aðhafst!
Þó ekkert rangt hafir gert
það er um vert
að þú sért
ekki trekt(ur).
Skattarnir munu hækka
þá matarverð eigi skal lækka
því ríkissjóð verður að stækka
erlendum skuldum skal fækka!
Á leið til helvítis vort þjóðfélag er
sá með sýn sér
að þannig fer
því er nú miður og ver.
Alþjóðargjaldeyrissjóður
sem virtist svo góður
á honum er ljóður
hann er þjófur!
Já fljótt hafa hlutir breyst
fórum svo geyst
að okkur er veist
fáum ey leyst.
Nú er að standa saman
hætta að hugsa um framan
það verður ljóta draman
en gaman
Uppbygging strax á að hefja
ekki skal tefja
burt þá skal berja
sem þjóð hyggðust semja
burt með veðum og selja
æskuna kvelja
ég skil það sé gremja!!!

Sigurbjörn Hreiðarsson

Árið á enda. Byrjaði þvílíkt vel. Man eftir því að hafa startað því nánast á nýjársfagnaði Vals með öllu því besta sem hægt var að hugsa sér. Einhver besta flugeldasýning í langan tíma og þetta leit þvílíkt vel út.
Þá hugsaði maður ekki um þessa vitleysu sem er í gangi núna. Á öllu átti ég von á undan því að ríkið færi að hækka skatta og þúsundir missu vinnu. Sá ekki fyrir allt þetta kjaftæði og bögg sem er í gangi núna. En fljótt skipast veður í lofti eins og sagt er. Mögru árin eða vonandi árið er framundan. Það verður spennandi og vonandi standa allir uppréttir eftir það þó harðni á dalnum.
Átti alls ekki von á því að fólk færi frekar eftir Völvunni heldur en framamönnum í þjóðfélaginu eins og ástatt er nú.  
Átti heldur ekki von á því að flugeldar myndu hækka um 40% þrátt fyrir að meirihluti þeirra sé frá því í fyrra! Skandall og stórfurðulegt. Stærsti fjölskyldupakkinn á 19 þúsund!!

Rosalega fór ég á gott gigg á laugardaginn. Hitti nánasta vinahópinn á árlegu spilakvöldi. Förum venjulega í bústað en nú er einn af félögunum Ingó í Danmörku en var hér yfir jólin. Tilvalið að gera eitthvað úr því. Dagurinn tekinn með körfu og gleði í heimahúsi eftir það. En enduðum á Players þar sem Bubbi og Egó spiluðu. Var í frábærum fíling alveg framundir morgun og í raun langt síðan ég hef tekið svona á því. Og svakalega var kallinn góður!

Fékk skíðaskó og stafi í jólagjöf m.a. Og þrátt fyrir að telja mig vera Dalvíking þá hef ég ekki verið rismikill í þeirri íþrótt. En þar sem fjölskyldan er öflug á skíðum þá er verið að draga mig með. Nú er engin afsökun og kem ég til með að vera orðinn slarkfær eftir veturinn. Var alltaf hræddur við að skemma fótboltaferilinn á þessum skíðum svo ég var bara með Adda Eggerts að stúdera knattspyrnu þegar aðrir fóru í fjallið í gamla daga á Dalvík.

Óli Stef verður svo valinn íþróttamaður ársins á næstu dögum. Held að Katrín Jónsdóttir verði íþróttamaður Vals á morgun og ég hef mjög mikla trú á skaupinu á morgun. Einnig hef ég ótrúlega mikla trú á að enn eitt árið verðum við svili minn bestir í götunni hvað flugelda varðar.
En gleðilegt ár og hafið það sem allra best þið sem rekist óvart eða að vilja inná þessa síðu.

Þoli illa þegar maður er í bloggstuði og það kemur einhver pikkles á síðuna sem heldur manni frá.
En nóg um það. Athyglisverður listi yfir 10 bestu íþróttamennina þetta árið. Er reyndar á því að kjörið þurfi ekki að fara fram þar sem Óli Stef fékk þetta strax í sumar. Ekki nokkur maður sem á séns í hann þetta árið sýnist mér. Næ samt ekki alveg af hverju Grétar Rafn fari ekki inná þennan lista, eða þá Hólmfríður Magnúsdóttir KRingur sem var að skora mikið fyrir landsliðið og kláraði t.d. bikarúrslitin með þrennu gegn okkur Valsmönnum. En sitt sýnist hverjum. En Óli fær sennilega fullt hús.                                     

Nokkuð sáttur við jafnteflið við Arsenal. Samt ekki nógu sáttur við að nýta ekki betur stöðuna einum fleiri. Runnum á rassgatið eftir það. Fannst rauða spjaldið verulega verðskuldað. Frá dómarans sjónarhorni þá getur hann ekki annað en rekið kallinn útaf. Hvað er Adebajor að gera með fótinn svona hátt þegar hann ætlar að stíga Liverpoolmanninn út? Fáranlegt og ég sem er jú með héraðsdómararéttindi hefði gefið honum rautt þarna líka. Veit ekki hvað Óli Þórðar er að væla í 4-4-2 þegar hann segir að þetta sé ekki neitt.
En að vera í efsta sæti þrátt fyrir allt er gott mál. Og ef Liverpool nýtir sér þetta ekki þá verð ég verulega svekktur.

Ákvað að lesa Maríu Magdalenu eftir séra Þórhall Heimisson. Alveg þrusugóð bók og mæli ég með henni fyrir þá sem eru trúarlega þenkjandi.Ekki löng en alltaf á skriði og varpar góðu ljósi á ýmsar nýtískulegar spurningar sem menn hafa sett fram eftir Davinsci lykilinn og fleiri kenningabækur.

Annars bara jólin allir saman  og áfram Valur

Ákvað að fara í ÁTVR og kaupa mér tvo bjóra af nýju íslensku týpunum og prófa aðeins. Taka svona einn öl á 2ja daga fresti (má ekki meira 5 mánuðir í mót) Er búinn að detta inná Skjálfta, Jökul, Gullfoss og Kalda ljósan.
Bragðmestur var Skjálfti og fínn svona þegar maður tekur einn, en ekki ef maður ætlar sér eitthvað meira það kvöldið. Of mikill eitthvað.
Gullfoss og Kaldi eru mjög líkir fannst mér, báðir góðir og mildari en Skjálfti. Þrusugóðir báðir.
Jökull kom á óvart og var bestur að mínu mati af þessum fjórum. Fannst ekkert vesen að drekka hann. Rann "hættulega" vel niður Nei spauglaust þá var hann fínn. Ef ég ætti að skralla aðeins þá tæki ég Jökul af þessum 4 tegundum svona í fyrstu.
Á eftir að prófa El Grillo af þeim tegundum sem ég keypti.

Ekki hægt að segja annað en að Kínverjarnir taki flugeldamálin alvarlega og fari alla leið þetta árið samkvæmt visi.is
"Kínverji sem talið var að látist hefði af völdum eldingar lést í raun þegar hann varð fyrir eldflaug sem ætlað var að framkalla rigningu. Lík hans sprakk svo í brennsluofninum"

Er ég sáttur við Pétur Blöndal þegar hann fer fram á að það verði tekinn upp skyldusparnaður aftur? Nei yfirleitt er ég nú ekki sammála PB og alls ekki nú.
Hvernig getur maðurinn farið fram á að það verði tekið af okkur skyldusparnaður þegar peningar margra hafa gufað upp hjá þeim sem áttu að gæta að fjármagni fólks. Traustið er ekkert á þessar peningastofnanir né ríkinu núna og því er það alveg með ólíkindum að menn fari fram með þessum hætti að enn verði skorið af peningakökunni okkar sem fer nú þverrandi.

Fyrir þá sem eru í kennarabransanum þá vil ég benda ykkur á að allur tannlæknastyrkur fellur niður um áramótin hjá sjúkrasjóði KÍ.
Þeir sem hafa verið að spandera yfir 50þús kall hingað til hafa getað sótt um styrk hjá KÍ uppað 1/3 af kostnaði (hefur verið gott mál því það kostar orðið tugi þúsunda að brosa eða opna kjaftinn á tannlæknastofum og því 1/3 gott mál).
Ef þið eigið nótur yfir 50 þús eða hafið hugsað ykkur að hressa svolítið uppá stellið og fá teina, redda frekjuskarði, taka silfrið, finna orsök andfýlunnar (ef einhver er) eða bara nýta styrkinn til almennrar tannhirðu þá verður það að gerast fyrir áramót þ.e. fá stimpilinn á nótuna

Hversu vafasamt múv var hjá Reyni Trausta í gær? Hversu gáfulega kom hann fram? Get ekki séð að hann sé trúverðugur kallinn þegar hann hefur svo sannarlega gengið auðvaldinu á hönd.

Við Valsmenn greinilega ekki hættir á leikmannamarkaðnum.

Hvernig er með þessa afbrotamenn sem ganga í skrokk á fólki hér á landi, eru þeir allir eins í útliti? Verð að segja að það er eins og þeir komi úr sömu nösinni.

Frekar svekktur með gærkvöldið þegar ég uppgötvaði að sýn ætlaði ekki að sýna frá NFL. Sýndu frekar golf í staðin sem mér finnst alls ekki nógu gott. Hef bara gaman af fjóru stóru golfmótunum þegar Tiger er með. Önnur golfmót mega missa sig. Ferlegt að sjá ekki þegar Dallas vann Giants í gær en leikurinn fór 20-12 eða eitthvað í þá áttina.

Var í nokkru stuði á föstudaginn. Kom við einum skyndibitastaðnum að kaupa tvö barnabox. Fór í bílalúguna. Þegar ég er búinn að tjá manninum í afgreiðslunni hvað ég vildi þ.e. tvö barnabox þá spurði hann hvað ég vildi að drekka með þessu.
Ég var í stuði og sagði tvær kók "en er ekki alveg öruggt að þær eru frá Vífilfell?" Maðurinn sem var greinilega mjög þreyttur segir "bíddu! ég ætla að athuga það!" kom svo rétt seinna og sagði "jú það er öruggt!!"
Svo eftir að hann sagði mér hvað þetta kostaði þá sagði ég við hann í bílalúgunni "og ég ætla að taka þetta með" svona til að halda ruglinu áfram. Þá segir minn "þetta er nú yfirleitt tekið með þegar menn panta svona í bílalúgu" greinilega að verða létt pirraður á þessari pöntun. Ég fílaði þetta reyndar vel og hafði verulega gaman af.

Svo er ástæða fyrir alla þá sem taka bara strætó og snerta ekki tóbak né áfengi að fagna því verðtryggð lán þeirra vaða upp þrátt fyrir staðfestuna og einskæran ásetning að vera ekki að bruðla. En svona er þetta nú. Ef maður minnist á að maður sé ekki alltof sáttur við að áfengið hækki svona þá er maður jafnvel stimplaður drykkjumaður. Ég kemst alveg af án áfengis en djöfulegt að fá þetta inní þessa vísitölu.
Hvernig er það annars, er ekki hægt að frysta vísitöluna núna bara?

Nú finnst mér alveg ástæða til að benda þingmönnum og borgarfulltrúum að kíkja á tölvunámskeið. Allavega að benda þeim á að senda ekki skeyti fyrr en þeir eru búnir að lesa yfir.

Jón Gerald hefur kjark hann má eiga það kallinn. Alveg ótrúlegt hvað hann lætur flakka. Held að ég myndi gefa lágvöruverslun hans séns barasta.

Töpuðum fyrir KR í gær. Jafn leikur þar sem fyrri hálfleikur var 45 mín en sá seinni 30 mín rúmar. Vantaði marga í okkar hóp en KR var nokkurn veginn með sitt lið. Reyndar var Gummi Ben ekki með né Bjarni Guðjóns. Nokkrir góðir kaflar og bara fínn leikur hjá báðum liðum.

Hvað með mína menn í Liverpool? Agalegt að tapa þessum heimastigum. Liðið verður að setja í hærri gír heima. Sem betur fer þá gerðu hin toppliðin líka jafntefli. Ætlar að verða æsilegt mót og sérstakt. Toppliðin virðast vera í takt, vinna á sama tíma o.s.frv. Hef samt trú á þessu þetta tímabilið.

Er að búa mig undir NFL á eftir. Vonandi sýna þeir Dallas-NYGiants. Nú dregur til tíðinda og bæði lið eiga auðvitað heima í úrslitakeppninni. Dallas er hinsvegar í basli með að komast þar inn á meðan Giants er superbowl kandidad. Giants hefur einhvern mesta bola seinni tíma, hlauparann Brandon Jacobs.

Varla lent í hvassari vindi og í gærkvöldi. Get svarði að ég komst varla inn til mín úr bílnum. Var um daginn í Köpen og fór í experimental safnið, svona stórt vísindasafn. Þar voru vindgöng sem hægt var að upplifa svaka vind. Þessi í gær doblaði það apparat. Kannski táknrænt að kári láti í sér heyra á þeim degi þar sem þingið okkar "góða" keyrir í gegn hverja vitleysuna á fætur annarri til að redda sínum klaufaskap en nóg um það.

En árlega jólamótið var í gær hjá okkur Valsmönnum. Var í besta liðinu eins og árlega reyndar. Við náðum samt ekki að vinna þetta. Málið er að mótið er spilað á tveimur dögum. Þeir sem mæta ekki fyrri en koma á seinni degi fara á uppboð. Venjulega skiptist þetta jafn en í gær fengum við tvo stjórnarmenn! Fínir í fyrsta leik en þá sprungnir og við því tveimur færri. Unnum þ.a.l. ekki þetta árið.

Fyrir þá sem halda að þeir hafi sofið vel alla ævi vil ég benda á að það hélt ég líka áður en ég fékk heilsukodda frá konunni í afmælisgjöf. Þvílíkur munur. Nú fer ég allt með koddann ef ég þarf að gista annars staðar.

Meistaradeildin búin þ.e. riðillinn. Verður spennandi að sjá hverjir mætast. Ég sem Liverpoolmaður vonast auðvitað eftir einhverju léttu. En er viss um að það verði eitthvað tæpt eins og Real eða í þeim dúr.
Ansi góðir markaþættir úr meistaradeildinni. Þoli samt ekki þegar þeir rúlla yfir þessa tölfræði. Hvað þessir og þessir áttu mörg skot, prósenta með boltan og fleira. Alveg óþarft í góðan þátt.
Fannst frábær punktur hjá Gumma Ben í gær þegar hann var að fara yfir lið Porto og var rétt búinn að fara yfir liðið þegar hann minntist á markmann Porto " allir vita svo hversu gríðarsterkur Hulk er" Markmaðurinn heitir sem sagt Hulk.

Vil svo minna þá sem þurfa á því að halda, stekkjastaur mætir í kvöld og þá verður gaman.

Var að spá í einu. Las um að einhverjir skólar eru að segja upp fólki. Í góðæri þá fá krakkarnir ekki fulla þjónustu því það fæst ekki fólk í störfin (launin betri annars staðar). Svo þegar kreppir að þá fá krakkarnir ekki fulla þjónustu því þá á að spara! Furðulegt dæmi. Eins og ég sagði áður síðasti hálvitinn er ekki fæddur því miður.